ព្រះសីហនុ៖ នាយករដ្ឋមន្ត្រីកម្ពុជា សម្ដេចធិបតី ហ៊ុន ម៉ាណែត បានលើកឡើងថា រាជរដ្ឋាភិបាលគ្មានអ្វីអាថ៌កំបាំងជាមួយនឹងប្រជាពលរដ្ឋនោះទេទាក់ទងជាមួយនឹងការជីកព្រែកហ្វូណនតេជោ និងការពង្រីកកំពង់ផែស្វយ័តក្រុងព្រះសីហនុ។

សម្ដេចបានលើកឡើងក្នុងពិធីបើកការដ្ឋានពង្រីកសាងសង់កំពង់ផែខេត្តព្រះសីហនុ នៅព្រឹកថ្ងៃសុក្រ ទី២២ ខែធ្នូ ឆ្នាំ២០២៣ នៅខេត្តព្រះសីហនុថា ការសាងសង់គម្រោងដ៏ធំទាំងពីរនេះគឺដើម្បីពង្រីកសក្ដានុពលរបស់កម្ពុជាធ្វើឲ្យសេដ្ឋកិច្ចរីកចម្រើនជួយទៅដល់ប្រជាជនកម្ពុជា។

គួរឱ្យដឹងដែរថាកម្ពុជាមានគម្រោងក្នុងការជីកព្រែហ្វូណន់តេជោដែលមានប្រវែងប្រមាណ ១៨០គីឡូម៉ែត្រចេញពីព្រែកតាកែវនៃទន្លេមេគង្គ ឆ្លងកាត់តាមព្រែកតាឯកនៃទន្លេបាសាក់ រួចចូលតាមព្រែកតាហ៊ីងនៃទន្លេបាសាក់ស្រុកកោះធំ និងបន្ទរហូតទៅដល់សមុទ្រខេត្តកែប។

គម្រោងសាងសង់នេះត្រូវប្រើប្រាស់ពេលប្រមាណ ៤ឆ្នាំ ដោយគ្រោងចាយលុយប្រមាណ ១ ៧០០លានដុល្លាអាមេរិក៕